Thursday, March 1, 2012

تقرير كامل عن طرد اللواء كاطوا من جامعة أسيوط



 
اللي حصل النهاردا مهزلة بكل المقاييس .. اللواء " أحمد سعيد كاتو " طلع نفسه عبد المنعم كاطو بتاع حرق المتظاهرين في أفران هتلر !!!  النهاردا كنا في مسرحية .. يعني مختارين أصغر قاعة في الجامعة ومجهزين فيها الطلبة بتوع الخدمة العسكرية من ندوة تانية قبلها ومنعوهم يطلعو الكلام دا حصل قدام عنيـا ..

انا ونورهان Norhan Elsaoudyكنا في القاعة من الساعة 10 ونص .. اتضح بعد كدا انهم كانو بيمنعو الشباب انهم يدخلو أما البنات أوكي ..
قبل اللوائين كان فيه نقيب باين كدا .. وقالنا نسأل في اللي عايزينه مثلا احداث محمد محمود أو بورسعيد .. المصيبة كل ما حد يسأل يقوله اسأل الخبرا الجايين أما لو جاوب عليه فطبعاً كلام لا يعتبر اجابة بل تهرب من السؤال ..
المهم الندوة بعد لما وصل اللوائين خلاصة الكلام :
 إن مصر على الطريق الصحيح وخلاص وصلت بر الأمان .. وأشادوا بإنجازات المجلس العسكري وأهم حاجة " اللـــــهو الخفـــــــــي " .. وانه فيه مخطط " أمـــريكي صهيونــــــي " لتخريب مصر .. و إن إسرائيل عايزة تقفل قناة السويس ..
وانهم معانا في عبارة " يسقط حكم العسكر " عشان هما مش العسكر !!!!!
المضحك إننا كنا مش عارفين ان كاتو هو نفسه كاطو إلا لما قال انه راح 3 جامعات وفي نهاية كل
 ندوة لازم يسمع هتاف " يسقط يسقط حكم العسكر " .. عشان الاعلام بيقول انه قال على حرق المتظاهرين في أفرات هتلر ..
و ان دا بسبب الاعلام المضلل والتوك شو .. واننا طبعا لازم منسمعش الاعلام الوحش دا
عارفين في البداية اتكلم اللوا نصر محمد وبعدين قال ادي الكلمة لزميلي عبد المنعم .. والله انا شكيت في وداني !!!!!
لكن هو بكل براءة صرحلنا انه هو نفسه كاطو ..
المهم الأسئلة فجأة اتجمعت من الطلبة وراحت عند طارق عبد العزيز( المسؤول عن النشاط في الجامعة ) ..
وفجأة نلاقي أسئلتنا تم اختصارهم في 3 أسئلة تافهة متكررة فقط .. وببساطة جاوب عليهم كاطو .. وباقي الأسئلة ولا كأنهم شافوها .. !
المهم قالو يلا عشان الطيارة اللي عنده سؤال .. رح قام مصطفى "Mostafa Mamdouh Mostafa" وسأله عن الانفلات الأمني في كل وقت ما عدا ايام الانتخابات .. جاوب بنفس أسلوب الهروب من الإجابة بتاعهم ..
بعدين قام ياسر Yasser Samy وسأله ازاي عايزني اتعامل معاك لما تقول اننا لازم نتحرق يعني
رح كاطو قاله انا قلت كدا على اللي حرق المجمع العلمي ..
وقاله كمان : رد عليا .. انت اللي حرقت المجمع العلمي ؟؟ ولما جيه ياسر يكمل قالوله متعقبش متعقبش .. واتلككو بالطيارة ومشيو ..
بس احنا طبعاً مخلينهمش يروحو كدا .. طلعنا وراهم بسرعة .. و رح ياسر وقف قدام كاطو .. رح مسلم عليه .. كان رد فعل ياسر رهيب .. قاله :
" كلمة أخيرة لحضرتك (بعدين سكت شوية وراح قايله ) .. يسقط حكم العسكر " ههههههههه كنت هموت في الموقف دا
وبعد الكلمة الأخيرة دي اشتغلنا هتاف .. " مسرحية مسرحية .. والعصابة زي ما هي " و " يسقط يسقط حكم العسكر "
فجأة لقينا طلبة الخدمة العسكرية بيهتفو " الشعب والجيش ابد واحدة" واحنا بقينا نرد عليهم بهتافات مضادة ..
والعربية اللي ركبوا فيها خبطو بيها بعض الشباب !!!! شوية تاني كانو هيبدأو بدهسنا زي عربيات الأمن في يناير ..

أما دعاء ÐøȜa M. Nâsr كانت هي اللي بتصور وكانو هيكسرو الكاميرا !!!

تقدرو تشوفو الفيديو بتاعها ممتاز بيوضح كويس ..
بجد كانت لحظات رهيبة .. مش ممكن تتكرر

No comments:

Post a Comment